BTC-dən nəql olunan neftin ümumi həcmində Qazaxıstan və Türkmənistanın da payı var
Bakı-Tbilisi-Ceyhan (BTC) boru kəməri ilə nəql olunan neftin ümumi həcmi 4,3 milyard barel təşkil edib. Bu barədə BP şirkətinin regional maliyyə direktoru Kolin Alan məlumat verib.
10-cu İllik Xəzər Texniki Konfransında çıxışında o bildirib ki, buraya Azərbaycan nefti ilə yanaşı Qazaxıstan və Türkmənistan yataqlarından hasil olunan neft də daxildir.
Hazırda “Azəri-Çıraq-Günəşli” yataqlar blokundan hasil olunan neft və “Şahdəniz” yatağından çıxarılan kondensat, SOCAR-ın nefti, eləcə də Xəzər dənizi regionunun digər ölkələrinin nefti BTC boru kəməri ilə nəql olunur.
Xəbər veridiyi kimi, 2023-cü ilin yanvar-oktyabr aylarında Bakı-Tbilisi-Ceyhan (BTC) boru kəməri ilə 25 milyon 172,5 min ton neft (artım 3%), həmçinin 4 miyon 270,3 min ton tranzit neft (artım 3,4%) nəql edilib.
BTC neft kəmərinin uzunluğu 1768 km-dir. Bunun 443 km-i Azərbaycan, 249 km-i Gürcüstan, 1076 km-i Türkiyə ərazisindədir. Boru kəmərinin ötürmə qabiliyyəti ildə 50 milyon tondan çoxdur.
Qeyd edək ki, layihənin iştirakçıları BP (30,1%); SOCAR (25%); MOL (8,9%); “Equinor” (8,71%); TPAO (6,53%); ENI (5%); “Itochu” (3,4%); “ExxonMobil” (2,5%); INPEX (2,5%), “TotalEnergies” (5%) və “ONGCVidesh” (2,36%) şirkətləridir
