Apple tarixinin ən böyük MacBook Air-i təqdim etməyə hazırlaşır
Apple şirkəti bir neçə yeni Mac, Apple Reality qarışıq reallıq (MR) qulaqlıqlarını, həmçinin iOS, macOS, iPadOS və digər əməliyyat sistemlərinin ən son versiyalarını təqdim edəcək.
Bu barədə Bloomberg-in tanınmış insayderi və müxbiri Mark Qurman öz Twitter hesabında məlumat verib.
Qurmanın sözlərinə görə, qarşıdan gələn WWDC23 təqdimatı iki saatdan çox davam edəcək. Beləliklə, qarşıdan gələn təqdimat Apple tarixində ən uzun təqdimat olacaq.
İnsayder Apple-ın hansı Mac-ları nümayiş etdirəcəyini dəqiqləşdirməyib, lakin MacRumors jurnalistləri hesab edirlər ki, onlardan ən azı biri uzun müddətdir şayiələr gəzən ilk 15 düymlük MacBook Air olacaq. Həmçinin nəşrin redaktorlarının fikrincə, Amerika İT nəhəngi yeni Mac Studio və Mac Pro təqdim edə bilər.
Yenilik, ilkin məlumatlara görə, özəl M2 prosessoru, artırılmış batareya, Wi-Fi 6E və Bluetooth 5.3 dəstəyi alacaq. Cihazla bağlı digər detallar şou çərçivəsində açıqlanacaq.
