Cek Dorsinin Twitter alternativi AppStore-da peyda olub
Twitter-in yaradıcısı Cek Dorsi AppStore-da Twitter-ə bənzər mikrobloq xidməti olan BlueSky adlı yeni proqram təqdim edib.
Kommersant yazır ki, hazırda proqramdan yalnız dəvətnamə ilə və yalnız iOS-da istifadə mümkündür. Hazırda BlueSky istifadəçilərinin sayı 2 min nəfəri keçmir. Sosial şəbəkə mərkəzləşdirilməmiş sosial şəbəkəni əhatə edən Authenticated Transfer Protocol (AT) açıq standartı üzrə fəaliyyət göstərir.
Twitter-in ABŞ-ın keçmiş prezidenti Donald Trampın hesabını qadağan etməsindən sonra Cek Dorsi belə bir layihə ideyasından ilhamlanıb. Dorsinin sözlərinə görə, BlueSky kimin söz sahibi olub, kimin söz sahibi olmadığına qərar verə bilən oxşar mərkəzləşdirilmiş platformalar tərəfindən səlahiyyətdən sui-istifadə və tənzimləmə ehtimalını azaldacaq.
"BlueSky Twitter-in yan layihəsi kimi başladı və ondan maliyyə aldı, lakin heç bir şəkildə ondan asılı deyil. Tətbiqin özü Twitter ilə demək olar ki, eynidir - 256 simvola qədər qısa mesajlar yerləşdirmək, fotoşəkillər yerləşdirmək mümkündür. Siz digər istifadəçiləri izləyə və onların yeniləmələrini görə bilərsiniz" - deyə Dorsi bildirib.
