Qırğızıstan hökuməti Azərbaycan və digər ölkələrin İT mütəxəssisləri üçün yeni status tətbiq edib
Qırğızıstanın Nazirlər Kabineti ölkəyə köçən xarici mütəxəssislər üçün xüsusi rejim tətbiq edib.
“Rəqəmsal köçəri” statusu aşağıdakı imtiyazlar verir:
– Qırğızıstanda yaşayış icazəsi və qeydiyyat olmadan yaşamaq hüququ;
– Respublika banklarında hesab açmaq və onlardan istifadə etmək hüququ;
– Şəxsi identifikasiya nömrəsini əldə etmək hüququ;
– İş icazəsi almamaq hüququ.
Qeyd olunur ki, “rəqəmsal köçəri” statusunu Rusiya, Azərbaycan, Ermənistan, Belarus, Qazaxıstan və Moldova vətəndaşları ala bilərlər. Aşağıdakı sahələrdə çalışan şəxslər “rəqəmsal köçəri” statusuna malik olacaqlar:
– Proqram təminatının tərtib edilməsi;
– Təhlil, informasiya sistemlərinin proqramlaşdırılması və proqram məhsullarının yaradılması;
– İnformasiya ehtiyaclarının və istifadəçi problemlərinin təhlili;
– İnformasiya texnologiyalarının, informasiya sistemlərinin və proqram təminatının ixracı;
– Virtual, genişləndirilmiş və qarışıq reallığın yaradılması;
– Rəqəmsal incəsənət;
– Qrafik dizayn, 3D-dizayn, multimedia dizaynı, animasiya;
– Süni intellektin yaradılması, robototexnika;
– Kompüter və mobil oyunların yaradılması, kiberidman.
Xüsusi statusun əldə edilməsini asanlaşdırmaq üçün ölkənin İqtisadi Ticarət Nazirliyi addım-addım təlimat hazırlayıb. Müraciətlər portal.tunduk.kg saytında qəbul ediləcək, sonra isə əmək və məşğulluq sahəsində səlahiyyətli orqana təqdim ediləcək. Ərizələrə üç iş günü ərzində baxılır. Statusun verilməsi üçün heç bir ödəniş tələb olunmur.
