Trampdan üçüncü dünya müharibəsi barədə XƏBƏRDARLIQ
ABŞ-ın keçmiş prezidenti Donald Tramp üçüncü dünya müharibəsi ehtimalını istisna etməyib.
ENA.az xəbər verir ki, o, bu barədə “Full Send Podcast” podkastında danışıb. Eks-prezidentin fikrincə, dünya müharibəsi şansı ona görə mövcuddur ki, dövlətlərə artıq hörmət edilmir. Tramp əlavə edib ki, adi amerikalılar Ukraynadakı vəziyyətə görə nüvə müharibəsindən qorxmalıdırlar, çünki ABŞ-ı “səriştəsiz insanlar” idarə edir.
Milyarderin sözlərinə görə, ABŞ üçün təhlükə Yaponiya və Almaniyanın hərbi cəhətdən güclənməsidir. “İndi biz Yaponiya və Almaniyanı hərbi cəhətdən böyük güclərə çevirməyə məcbur edirik və mən də daxil olmaqla, bir çox insan bunun yaxşı fikir olmaya biləcəyi barədə xəbərdarlıq edir”, – Tramp deyib.
Eks-prezident Amerika hakimiyyətinə istəkləri ilə daha diqqətli olmağı tövsiyə edib.
Xatırladaq ki, daha əvvəl Tramp Amerika hərbi F-22 qırıcılarının Çin bayraqları ilə rənglənməsini və Çin adından Rusiyanı bombalamağa göndərilməsini təklif edib. Eks-prezident komik ideyanın köməyi ilə Ağ Evin hazırkı rəhbəri Co Baydeni məsxərəyə qoyub, sonuncunu zəiflikdə və qətiyyətsizlikdə ittiham edib.
