Bakıda avtomobillər bahalaşdı

2018-ci ilin noyabrında Bakının avtomobil bazarında orta qiymət 42 152 manat təşkil edib.

Bunu "MBA Group" konsaltinq şirkətinin baş direktoru, ekspert Nüsrət İbrahimov deyib.

Ekspertin sözlərinə görə, oktyabrla müqayisədə qiymətlər noyabrda 12,22% artıb.

N.İbrahimov bildirib ki, noyabr ayında ümumilikdə 1 729 avtomobil satışa çıxarılıb:

“Oktyabr ayı ilə müqayisədə avtomobil bazarında təkliflər portfeli avqustda 2,26% azalıb. Satışa çıxarılan avtomobillərin 87,39%-i benzin mühərrikli avtomobillərdir. Bu kateqoriyalı avtomobillərin orta qiyməti 41 512 manat təşkil edib. Oktyabrla müqayisədə bu, 10,15% artım deməkdir. Dizel mühərrikli avtomobillər bazarın 12,61%ni təşkil edib, orta qiymət isə 45 314 manat olub (22,9 faiz artım). Avtomat sürət qutusu ilə olan avtomobillərin payı 75,77 faiz, orta qiyməti 50 932 manat, mexaniki sürət qutusu olan avtomobillərin payı 24,23 faiz, orta qiyməti 13 644 manat təşkil edib”.

Ekspert bildirib ki, noyabr ayında bazardakı avtomobillərin orta yürüş göstəricisi 150,39 min kilometr təşkil edib ki, bu göstərici oktyabr ayı ilə müqayisədə 13,61 faiz az olub.