Neft 2014-cü ildən bəri ilk dəfə 92 dollara qalxdı
Bugün neftin qiymətinin qalxması sürətlənib və Brent markalı neft 2014-cü ilin oktyabrından bəri ilk dəfə bir barel üçün 92 dolları ötüb.
Londonun ICE Futures birjasında cümə günü saat 12:49-a Brent markalı neftin aprel fyuçerslərinin dəyəri bir barel üçün 92,05 dollar təşkil edir ki, bu da əvvəlki sessiyanın bağlanış qiymətindən 0,94 dollar (1,03%) çoxdur.
Nyu-York əmtəə birjasının (NYMEX) elektron ticarətində mart ayı üçün WTI neftinin fyuçerslərinin qiyməti bu vaxta kimi bir barel üçün 91,28 dollar təşkil edir ki, bu da cümə axşamı sessiyanın yekun dəyərindən 1,01 dollar (1,12%) çoxdur. WTI kotirovkaları da 2014-cü ilin oktyabrından bəri ən yüksək həddə çatıb.
Neft bazarı tələbin aktiv bərpası fonunda qeyri-kafi təklif qorxusu ilə dəstəklənməyə davam edir. Təchizat üçün risk faktorları Şərqi Avropa və Yaxın Şərqdə geosiyasi gərginliklər, həmçinin bir çox OPEC+ ölkələrinin hasilatı razılaşdırılmış səviyyəyə qədər artıra bilməməsidir.
