Azərbaycanda ən çox hansı sahələrə investisiya qoyulub?

Bu ilin ötən altı ayında iqtisadiyata pul qoyuluşu azalıb. ENA.az xəbər verir ki, 2021-ci ilin yanvar-iyun aylarında Azərbaycan iqtisadiyyatına kapital qoyuluşları 5 milyard 919,4 milyon manat təşkil edib. 

Dövlət Statistika Komitəsinin analoji dövr üzrə rəqəmlərinə baxsaq, bu ötən ilin eyni dövrünün göstəricisindən 7,6% azdır. 

Bu müddətdə neft-qaz sektoruna yatırılmış investisiyaların həcmi 2,8% azalaraq 2 milyard 741,2 milyon manat olub. Qeyri-neft qaz sektoruna yatırılan investisiyaların həcmi isə 11,3% kiçilib və 3 milyard 178,2 milyon manatdır.

Yanvar-iyun aylarında istifadə olunmuş vəsaitin 4 milyard 68,9 milyon manatı və ya 68,7%-i məhsul istehsalı sahələrinə, 1 milyard 381,5 milyon manatı və ya 23,4%-i xidmət sahələrinə, 469 milyon manatı və ya 7,9%-i isə yaşayış evlərinin tikintisinə sərf olunub.

Əsas kapitala yönəldilmiş vəsaitlərin 2 milyard 309,1 milyon manatını və ya bütün investisiyaların 39%-ini xarici, 3 milyard 610,3 milyon manatını və ya 61%-ni daxili vəsaitlər təşkil edib.

Xatırladaq ki, 2020-ci ildə Azərbaycanda əsas kapitala vəsait qoyuluşları 8,3% azalmışdı və bu tendensiya yuxarıda göründüyü kimi davam edir.