Azərbaycan dəmiryolu Rusiyadan Türkiyəyə taxıl nəqlinə başlayıb
“ADY Express” MMC Bakı-Tbilisi-Qars dəmir yolu vasitəsilə Rusiyadan Türkiyəyə taxıl və buğda kəpəyi nəql edib.
MMC-dən bildirilib ki, 13 örtülü vaqonda 780 ton taxıl Rusiyanın Tatarskaya stansiyasından (Qərbi-Sibir dəmir yolu), 8 taxıldaşıyan vaqonda 480 ton buğda kəpəyi isə Şadrinsk stansiyasından (Cənub-Ural dəmir yolu) göndərilib. Rusiya-Azərbaycan sərhəddində yerləşən Yalama stansiyasından keçən yüklər daha sonra Böyük-Kəsik və daha sonra Gürcüstanın Axalkalaki stansiyasına çatdırılıb. Burada vaqonlarda təkər cütləri dəyişdirildikdən sonra taxıl və kəpək Türkiyənin Qars şəhərinə yola salınıb.
Taxıl yükü ümumilikdə 4745 kilometr, buğda kəpəyi isə ümumilikdə 4054 kilometr məsafəni qət erdikdən sonra təyinat nöqtəsinə çatdırılıb. Yüklərin nəqlini “ADY Express” MMC tərəfdaşları ilə – “RJD Logistika” (Rusiya), “GR Logistics” (Gürcüstan) və “Pasifik Eurasia Logistics” (Türkiyə) şirkətləri ilə həyata keçirib.
Qeyd edək ki, BTQ dəmir yolu bu cür yüklərin nəqli yük sahiblərinə ənənəvi dəniz yolu ilə nəqlindən daha sərfəlidir. BTQ ilə fasiləsiz kiçik həcmli yükləri daşımaq mümkündür ki, əvvəllər yük sahibləri bu yükləri Türkiyəyə göndərmək üçün Novorosiysk limanında gəminin doldurulmasını gözləməli olurdular və limanda yüklərin aşırılması əməliyyatlar aparılırdı. Bu da əlavə xərclər deməkdir. Bundan başqa BTQ vasitəsi ilə yüklərin nəqli tranzit vaxtını 2 dəfə azaldır. Yük sahibləri Bakı-Tbilisi-Qars vasitəsilə mütəmadi olaraq bu cür yüklərin Türkiyəyə göndərilməsini planlaşdırır.
