Angela Merkelin təyyarəsində yaranan nasazlıqda kriminaldan şübhələnirlər
Almaniya hökuməti kansler Angela Merkelin Buenos-Ayresə uçduğu təyyarədə yaranan texniki nasazlıqda kriminal izin olduğundan şübhələnir.
"BI" Interfax informasiya agentliyinə istinadla xəbər verir ki, bunu hakimiyyət strukturunda olan mənbə bildirib.
Bir qədər əvvəl “Airbus A340-300” hökumət təyyarəsinin texniki nasazlığa görə Kölnə məcburi eniş etdiyi və bu səbəbdən Angela Merkelin G20 sammitinin açılışına gecikəcəyi barədə məlumat yayılmışdı. Nəticədə Almaniya kansleri Buenos-Ayresə uçuşunu noyabrın 30-da səhər saatlarında İspaniyanın paytaxtından yerli aviakompaniyanın təyyarəsi ilə adi sərnişin kimi davam etdirib.
“Angela Merkel Argentinaya axşam saatlarında çatacaq, bu, o deməkdir ki, kansler gün ərzində planlaşdırılan tədbirlərdə və görüşlərdə iştirak edə bilməyəcək”, - deyə Almaniya Nazirlər Kabinetindən bildiriblər.
“Die Rheinische Post” nəşrinin məlumatına əsasən, Merkel Köln şəhərində insidenti Almaniyanın müdafiə naziri Ursula fon der Lyayenlə müzakirə edib.
