Dövlət Neft Fondu aktiv şəkildə qızıl alır
2020-ci ilin yanvar-iyun ayları ərzində Azərbaycan Dövlət Neft Fondu (ARDNF) 17 min 916 troya unsiya qızıl alıb. Nəticədə investisiya portfelində qızılın payı 13,6% təşkil edib. Bu isə 101,8 ton və ya 3 milyon 272 min 975 troya unsiya deməkdir.
2019-cu il dekabrın 31-nə olan vəziyyətə görə, ARDNF-in investisiya portfelinin strukturunda qızılın payı 11,4% və ya 4,93 milyard dollar məbləğində idi və 101,244 ton təşkil edirdi.
ARDNF 2012-ci ilin əvvəlindən qızıl alışına başlayıb. 2012-2013-cü illərdə fond tərəfindən 30 174,89 kq (970 145,51 unsiya) qızıl alınıb. 2014-2017-ci illərdə isə qızıl alınmayıb. 2018-ci ildə ARDNF qızılın alışını bərpa edib və ötən il ərzində 20 min 778 kq (668,041 min troya unsiyası) qızıl alıb. 2019-cu ildə fond tərəfindən 50,2 tondan çox qızıl alınıb.
2020-ci il üçün ARDNF-in vəsaitlərindən istifadə proqramına uyğun olaraq gələn il fondun investisiya siyasətinin əsas məqsədi kapital itkiləri riskinin aşağı səviyyədə saxlanması şəraitində maksimum gəlir əldə edilməsidir.
Şərtlərə əsasən, 2020-ci il ərzində fondun borc öhdəlikləri və pul bazarları alətləri portfeli investisiya portfelinin məcmu dəyərinin maksimum 55%-ni; səhm (pay) portfeli investisiya portfelinin məcmu dəyərinin maksimum 25%-ni; daşınmaz əmlak portfeli investisiya portfelinin məcmu dəyərinin 10%-ə qədərini; qızıl portfeli investisiya portfelinin məcmu dəyərinin 10%-ə qədərini təşkil etməlidir.
ARDNF-də neft müqavilələrinin reallaşmasından, əsasən dövlətin mənfəət neftinin satışından, ölkə ərazisində neft və qaz nəqlinə görə tranzit tariflərindən, dövlət əmlakının icarəsindən daxil olan gəlirlər toplanır.
