"Ege Hospitalı"nda ölmüş şəxsi ürək əməliyyatı etmək istədilər- İDDİA

Ege Hospitalında ölüm hadisəsi baş verib.

Bu barədə 72 yaşlı pasiyent Əliyəsər Xasməmmədovun yaxınları məlumat yayıblar.

Yaxınları xəstənin ölümündə hospitalın kardioloq-cərrahı Ülvi Mirzoyevin günahkar olduğunu iddia ediblər. Ə.Xasməmmədovun qızı Səbinə Nəzərova isə iddiasını sosial şəbəkədə ictimailəşdirib:

“Ülvi Mirzoyev ayın 24-ü atamı müayinə edib diaqnoz qoydu ki, stend qoymaq lazımdır. Təklif etdi ki, anju eləmişəm əgər yanınızda pul varsa, indi qoyaq. Çünki 98 faiz damarları tutulub. Dedi ki, 6 ədəd stend qoymaq lazımdır. Soruşduq ki, bu qədər stend qoymaq olarmı? Dedi ki, bəli mən 8 ədəd belə qoymuşam. 10 000 manat ödəyib razılaşdıq. 2 gün sonra buraxdılar, ayın 4-də gecə atam özünü pis hiss edirdi və təcili tibbi yardım yoxlayıb dedi ki, bu qədər stend qoymaq olmaz. Atam səhər öz maşını ilə anamla həkimə gedib. Həkim deyib ki, 1500 manat ödədikdən sonra müayinəyə gəlin. Yarim saat sonra isə sənədləri gətirib ki, imzalayın açıq  əməliyyat edək. Anam həkimə dedi ki, xəstəni göstərin, sonra biz imzalayaq. Deməli, xəstə artıq dünyasını dəyişib və bu özünə həkim adı qoyan məxluq ölmüş insanı əməliyyat etmək istəyirmiş. Biz ondan bunun səbəbini soruşmaq istəyəndə artıq həkimin ortalıqda olmadığını gördük. Üstəlik, 200 manat ödəyərək atam məscidə yumağa göndərib. Sən kimsən ki, kiminsə meyitini icazəsiz məscidə aparasan?!”

Ülvi Mirzoyev

Ü.Mirzoyev isə “Report”a açıqlamasında qeyd olunanların böhtan olduğunu bildirib.

“Qeyd olunanlar hamısı əsassız fikirlərdir. Bunlar sosial şəbəkələrdə əsası olmayan məlumatları yayırlar. Biz həmin xəstəmiz üçün çox vuruşduq. Mənimlə yanaşı digər həkimlərimiz də xəstəmizin həyatdakı son saniyəsinə qədər onu xilas etmək üçün mübarizə apardıq. Onun ölüm səbəbi biz deyilik, bizim hansısa yanlış hərəkətimiz, yanlış müalicə, səhv əməliyyat olmayıb. Hər şey doğru olub, hər şey Avropa Kardiologiya Cəmiyyətinin, Amerikan Ürək Assosiasiyasının, eləcə də Azərbaycanın Kardiologiya Cəmiyyətinin ümumi tövsiyələri əsasında həyata keçirilib.  Mən Türkiyədə və İngiltərədə universitet bitirmişəm. Nüfuzlu universtitetlərdə təhsil almışam. 20 illik stajım var. Əlbəttə, hər bir həkim səhv edə bilər. Amma konkret olaraq bu xəstəmizlə bağlı bizim heç bir səhvimiz olmayıb. Xüsusən də burada heç bir səhlənkarlıqdan söhbət gedə bilməz. Xəstəmizin anadangəlmə laxtalanma problemi olub. Yüksək dozalarda verdiyimiz qandurulducu dərmanlara baxmayaraq damarlarında tramboz oldu və xəstə ikinci dəfə gələndə biz o trambozu müalicə etməyə çalışsaq da, alınmadı. Ona görə də biz əməliyyat qərarı versək də çatdıra bilmədik və xəstəmizin ürəyi dayandı. Biz dərhal digər reanimasiyan tədbirlərə keçsək də onun həyatını xilas etmək mümkün olmadı”.

Həkim xəstənin yaxınlarının stend sayı ilə bağlı iddialarına münasibət bildirib. Onun sözlərinə görə, heç bir tibbi ədəbiyyatda stend sayında məhdudiyyət yoxdur. Ü.Mirzoyev qeyd edib ki, məsələ stendin sayında deyil, xəstəliyin yayqınlığındadır:

“Tibbdə 100 faizlik nəticə yoxdur, ən çox baş verən ölüm də ürək-damar xəstəliklərindəndir. COVID-19-dan 3 faizlik ölüm nisbəti var – bu xəstəlikdən kimsə rəhmətə gedəndə heç təəccüblənmirlər. Amma ürək-damar xəstəliklərindən kimsə vəfat edəndə, dərhal sensasiya olur və həkimlər hədəfə alınır. Biz Allah deyilik və hər şey də bizim əlimizdə deyil. Xəstənin yaxınları da həmin gün bütün bu məsələlərlə bağlı bizimlə araşdırma aparmadan xəstəxanada hay-küy saldılar və qapını qırdılar. Onlar bizi məsələni izah etməyə imkan vermədilər. Amma biz hər şeyi onların yaxınlarından birinə izah etdik”.

Kardioloq-cərrah xəstənin öldükdən sonra əməliyyat etmək istədiyimiz barədə məlumatlar da əsassızdır: “Guya biz ölmüş cənazəni əməliyyat etmişik, bunlar hamısı absurd fikirlərdir. Hospitalda kamera görüntüləri var. Bu, hər şeydən əlavə insanlığa və ağıla sığan bir şey deyil. Xəstə dünyasını dəyişəndən sonra yaxınları istəyinə uyğun olaraq hospitalın müəyyən işçiləri cənazənin yuyulmasın üçün köməklik göstəriblər. Onun həkimlərlə, şəxsən mənimlə heç bir əlaqəsi yoxdur”.