Prezidentin Ehtiyat Fondunun pulları nəyə xərclənib? - HESABATDAN

2019-cu ildə Azərbaycan Respublikası Prezidentinin ehtiyat fondundan 296,7milyon manat vəsait istifadə olunmuşdur. ENA.az hökumətin hesabatına əsasən xəbər verir ki, büdcə ilinin sonuna istifadə olunmamış 3,3 milyon manat vəsait isə dövlət büdcəsinin vahid xəzinə hesabına köçürülüb.

Hesabata görə, həmin vəsait hesabına respublikanın şəhər və rayonlarında avtomobil yollarının tikintisinə və yenidən qurulmasına 103,8 milyon manat, xarici populyar televiziya kanallarında respublikanın təbliğinin  təşkilinə,  teleradio  yayımçılarına əlavə maliyyə dəstəyinə, onların maddi-texniki bazasının  möhkəmləndirilməsinə və digər  mədəniyyət  tədbirlərinin  maliyyələşdirilməsinə 29,826 milyon manat, şəhər və rayonlarda çoxmənzilli binaların dam örtüklərinin dəyişdirilməsinə, təmir, tikinti,  mənzil-məişət  şəraitinin  yaxşılaşdırılmasına və abadlıq quruculuq  işlərinin  aparılmasına 28,1  milyon  manat xərclənib.

Kənd  təsərrüfatı,  meliorasiya  və su  təsərrüfatı  sahələrinin  fəaliyyətinin yaxşılaşdırılmasına 26,4 milyon manat, respublikada baş vermiş təbbi fəlakət nəticəsində dəymiş ziyanın aradan qaldırılmasına 22,8 milyon manat, səhiyyə və təhsil müəssisələrinin tikintisinə və yenidənqurulmasına  16,0  milyon  manat, əhaliyə göstərilən  nəqliyyat  xidmətinin  maddi-texniki bazasının  möhkəmləndirilməsinə 14,2 milyon  manat ödənilib.

Azərbaycan Respublikasının ərazi bütövlüyü,  müstəqilliyi  və konstitusiya quruluşunun  müdafiəsinə və ikinci  dünya  müharibəsi iştirakçılarına və əlillərinə avtomobil təminatına və birdəfəlik yardımların verilməsinə 11,0 milyon manat ayrılıb.

Küçələrin əsaslı təmiri, işıqlandırma sistemlərinin yenilənməsi və abadlıq quruculuq işlərinə 8,0  milyon  manat, əhaliyə göstərilən  kommunal  xidmətlərin  maddi-texniki  bazasının möhkəmləndirilməsinə 7,5 milyon manat, Bakı şəhərində 2 və Sumqayıt şəhərində 1 yeni “ASAN” xidmət mərkəzlərinin layihələndirilməsinə və tikintisinə 7,0 milyon manat verilib.

Xüsusi qayğıya ehtiyacı olan  uşaqlara  və digər  şəxslərə sosial  xidmətin  genişləndirilməsinə 5,0 milyon  manat, Mehdi Hüseynzadə adına Sumqayıt şəhər stadionununun yenidənqurulmasına 5,0 milyon manat, şəhər və rayonlarda yerləşən Heydər Əliyev Mərkəzlərində Gənclərin İnkişaf və Karyera Mərkəzinin nümayəndəliklərinin  yaradılmasına və fəaliyyətinin  təmin  edilməsinə 4,0  milyon  manat xərclənib.

Dini qurumlara maliyyə yardımının göstərilməsinə 3,3 milyon manat, Bakı şəhəri Nizami rayonunda yerləşən ticarət  mərkəzində baş  vermiş  yanğın  nəticəsində zərər  çəkmiş  sahibkarlara  maddi yardımın verilməsinə 3,0 milyon manat və digər tədbirlərin maliyyələşdirilməsinə 1,8 milyon manat vəsait sərf olunub.

Azərbaycan Respublikası Prezidentinin ehtiyat fondundan istifadə olunmuş vəsaitin 237,3 milyon manatı və ya 80 faizi əsaslı vəsait qoyuluşu xərclərinin, 59,4 milyon manatı və ya 20 faizi  cari  xərclərin  maliyyələşdirilməsinə yönəldilib.  Cari  xərclərə yönəldilən  vəsaitin 14,5 milyon manatı  və ya 24,4 faizi sosialyönlü tədbirlərə sərf edilib.