Rusiyadan 75 milyon dollarlıq benzin idxal olunub
Azərbaycan 2019-cu ildə 114 min 314 ton AI-92 markalı avtomobil benzini idxal edib.
Bu barədə hökumətdən məlumat verilib.
“2019-cu ildə Azərbaycana 77 milyon 24 min dollar dəyərində Aİ-92 markalı avtomobil benzini yalnız idxal edilib”, - hökumətdən bildiriblər.
Xəbər verildiyi kimi, 2018-ci ildə Azərbaycana 77 milyon 249 min dollar dəyərində 72 min 596 ton Aİ-92 markalı avtomobil benzini idxal edilib. Beləliklə, 2019-cu ildə ölkəyə benzin idxalı miqdar ifadəsində 57,5%, dəyər ifadəsində 31,1% artıb.
Həmçinin, 2019-cu ildə 2 milyon 620 min dollar dəyərində 4 min 171 ton benzin Türkmənistandan, 74 milyon 629 min dollar dəyərində 110 min 143 tоn benzin Rusiyadan idxal olunub.
2018-ci ildə Aİ-92 markalı benzin Rusiya və Böyük Britaniyadan idxal edilmişdi. 2019-cu ildə Azərbaycan RF-dən benzin idxalını miqdar ifadəsində 2,8 dəfə, dəyər ifadəsində 2,3 dəfə artırıb.
2019-cu ilin ikinci yarısında respublikaya Aİ-92 markalı avtomobil benzininin idxalı Heydər Əliyev adına Bakı Neft Emalı Zavodunun bir ay müddətinə planlı təmirə dayandırılması ilə əlaqədar SOCAR-ın ehtiyatların yaradılması planları ilə şərtlənib. Zavodun təmirə dayandırıldığı 2019-cu il oktyabrın 4-dən noyabrın 4-dək burada Aİ-92 markalı benzin istehsal edilməyib.
Bunun üçün Nazirlər Kabinetinin qərarı ilə Azərbaycana idxal edilən AI-95 və AI-92 markalı avtomobil benzini 2019-cu il sentyabrın 1-dən 90 gün müddətində gömrük rüsumundan azad edilib. Qeyd olunan benzin növləri üçün gömrük rüsumu 15%-dən 0%-ə endirilib.
Bundan başqa, tərkibində qurğuşunun miqdarı 0,013 q/l-dən çox olmayan, 95 və 92-dən az oktan ədədi ilə benzin üçün aksiz dərəcəsi 1 ton üçün 200 manatdan 1 manata endirilib.
2018-ci ildə AI-92 markalı avtomobil benzini yalnız dördüncü rübdə idxal olunub. Bu dövrdə idxal BNEZ-də modernləşdirilmə və bərpa layihəsi çərçivəsində təmir işləri ilə əlaqədar olub.
BNEZ-də yalnız Aİ-92 markalı benzin istehsal edilir.
