“Şahdağ Turizm Mərkəzi” zərərdə - DAHA DA ARTIB
Dövlət Turizm Agentliyinə məxsus “Şahdağ Turizm Mərkəzi” QSC 2018-ci ili 27 milyon 470 min manat zərərlə başa vurub.
Şirkətin maliyyə hesabatına görə, bu, 2017-ci ilə nisbətən 12,6% çoxdur.
2018-ci ildə “Şahdağ Turizm Mərkəzi”nin göstərdiyi xidmətlərdən gəlirləri 19 milyon 357 min manat (2017-ci illə müqayisədə 15,3% az), xidmətlərinin maya dəyəri 23 milyon 586 min manat (7,3% az), digər gəlirləri 374 min manat (46,2% az), kommersiya xərcləri 6 milyon 416 min manat (0,9% az), inzibati xərcləri 12 milyon 116 min manat (8,7% az), sair əməliyyat xərcləri 144 min manat (3,9 dəfə çox), maliyyə xərcləri 160 min manat (36,75% çox), gəlir vergisi ödəmələri isə 4 milyon 779 milyon manat (84% çox) təşkil edib.
2019-cu il yanvarın 1-nə “Şahdağ Turizm Mərkəzi”nin aktivləri 503 milyon 708 min manat olub ki, bu da 2018-ci il yanvarın 1-nə nisbətən 5% azdır. Bunun 493 milyon 842 min manatı və yaxud 98%-i əmlak və adavanlıqlardır ki, bu da illik müqayisədə 5,3% azdır.
Hesabat dövründə şirkətin öhdəlikləri 93,1% artaraq 12 milyon 295 min manata çatıb, balans kapitalı isə 6,2% azalaraq 491 milyon 413 min manata düşüb.
Xatırladaq ki, “Şahdağ Turizm Mərkəzi” 2015-ci ildə yaradılıb. Onun nizamnamə kapitalı 546 milyon 776 min manatdır. Şahdağ milli parkının yaxınlığında salınmış kompleks Azərbaycanda ilk və ən böyük dağ-xizək kurortudur.
