Manat Lirə və Lari qarşısında kəskin bahalaşıb
2019-cu ilin 9 ayında Manat ən çox Türk Lirəsi və Gürcü larisi qarşısında bahalaşıb.
"ENA" xəbər verir ki, bu barədə, Azərbaycan Mərkəzi Bankının 2019-cu ilin yanvar-sentyabr ayları üzrə pul siyasəti icmalında bildirilir.
Qeyd edilib ki, dövr ərzində manat türk lirəsinə qarşı 6.6%, avroya qarşı 4.5%, gürcü larisinə qarşı 9.8% bahalaşmışdır.
Eyni zamanda milli valyuta Ukrayna qrivnasına qarşı 14.3%, Rusiya rubluna qarşı 7.3%, yapon yeninə qarşı 2.6% ucuzlaşmışdır.
"İkitərəfli məzənnələrin dinamikası çoxtərəfli məzənnənin dinamikasına da təsir göstərmişdir. 9 ayda manatın qeyri-neft ümumi ticarət çəkili nominal effektiv məzənnəsi 1.4% bahalaşmış, real effektiv məzənnəsi isə 1.3% ucuzlaşmışdır. Real effektiv məzənnənin ucuzlaşması Azərbaycanda inflyasiyanın ticarət tərəfdaşı olan ölkələr üzrə orta inflyasiyadan əhəmiyyətli az olması ilə izah edilir",- İcmalda deyilir.
Qeyd edək ki, 2018-ci ərzində manat ABŞ dollarına qarşı 0.01%, Türk lirəsinə qarşı 28.6%, Avroya qarşı 4.1%, İngiltərə funt sterlinqinə qarşı 5.9%, Rus rubluna qarşı 16.9% möhkəmlənmişdi. İkitərəfli məzənnələrin dinamikası çoxtərəfli məzənnənin dinamikasına da təsir göstərmişdir. İl ərzində manatın qeyri-neft sektoru üzrə ümumi ticarət çəkili real effektiv məzənnəsi 6.1% möhkəmlənmişdi.
