“AYİB-in “Unibank”dakı payının azalmasında mənfi nə isə axtarmaq lazım deyil”
“Avropa Yenidənqurma və İnkişaf Bankının (AYİB, EBRD) “Unibank”dakı payını 44,5%-dən 9%-ə endirməsində mənfi nə isə axtarmaq lazım deyil”.
Bunu jurnalistlərə açıqlamasında “Unibank”ın İdarə Heyətinin sədri Faiq Hüseynov deyib.
“EBRD institusional investordur. Adətən bu cür investorlar mandatlarına uyğun olaraq hər hansı müəssisədə müvəqqəti pay alırlar. Yəni, onlar hansısa şirkətə investisiya qoyurlar, onu inkişaf etdirirlər, 5-7 ildən sonra isə paylarını ya digər strateji investorlara, ya da mövcud səhmdarlar satırlar, ya da açıq bazara çıxarırlar.
EBRD 2002-ci ildən “Unibank”ın səhmdarıdır, yəni 17 ildir ki, bizimlədir, bir çox mərhələlərdən birlikdə keçmişik. Xüsusilə 2015-ci ildə maliyyə sektorunda yaranmış gərgin vəziyyətdə EBRD “Unibank”dakı payını artırdı, Banka dəstək verdi ki, həmin dövrdən problemsiz keçək.
Hazırda “Unibank”ın vəziyyəti sabitləşib, Ölkə prezidentinin “Fiziki şəxslərin problemli kreditlərin həlli ilə bağlı” fərmanından sonra Bankda likvidlik yaranıb, mənfəətlə işləyirik, kapitalımızı bərpa etmişik. EBRD də mandatına uyğun olaraq yavaş-yavaş “Unibank”dakı payını azaldır, amma hələ ki, səhmdarlarımız sırasında qalıb”, - deyə sədr qeyd edib.
Qeyd edək ki, Avropa Yenidənqurma və İnkişaf Bankının “Unibank”dakı payını azaltması "xarici investorların Azərbaycanın bank sektoruna marağının azaldığı" şəkilində şərh edilib.
Xəbər verdiyimiz kimi, Eldar Qəribov Avropa Yenidənqurma və İnkişaf Bankının “Unibank”dakı payının bir hissəsini alaraq Bankdakı payını kəskin artırıb Bağlanan alqı-satqı əqdi nəticəsində Eldar Qəribovun Bankın Nizamnamə kapitalında iştirak payı artaraq 41,9091%-dən 77,3839 %-ə qaldırılıb. Əqdin həcmi 16 392 273 ədəd adi adlı sənədsiz səsli səhmdən ibarət olmaqla, Bankın bütün səhmlərinin Nizamnamə kapitalına olan faiz nisbətinin 35,4748 %-ni təşkil edib.
Cənab Eldar Qəribov Bankın Nizamnamə kapitalındakı iştirak payınının əvvəlki səviyyəsini bərpa etməklə, onu bir az da artırıb. Avropa Yenidənqurma və İnkişaf Bankının (AYİB) iştirak payi isə 9% təşkil edib
