Aktivlərini 51% artırmağa nail olan bank hansıdır? – HESABAT
Dəyişməyən müştəri portfeli ilə seçilən “Bank Silk Vey” ASC bütün rüblərdə olduğu kimi yenə mənfəət açıqlayıb.
BI xəbər verir ki, bank yanvar-sentyabr aylarını 28,18 milyon manat xalis mənfəətlə başa vurub. Bu göstərici ötən ilin eyni 4 dövrü ilə müqayisədə 4,2 dəfə çoxdur.
Mənfəət və zərər hesabatına əsasən, “Bank Silk Vey"in faiz gəlirləri 26 milyon 879 min manat, faiz xərcləri 10 milyon 624 min manat olub. Yəni bu bankın kreditlər üzrə faizləri yığmaqda həmişəki kimi problemi yoxdur.
Bankın qeyri-faiz gəlirləri 16 milyon 94 min manat, qeyri-faiz xərcləri 22 milyon 933 min manat, xüsusi ehtiyatlara ayırmaları 19 milyon 168 min manat, mənfəət vergisi ödəmələri isə 404 min manat təşkil edib.
Bu rüb “Bank Silk Vey”in aktivləri 614 milyon 147 min manat olub ki, bu da illik müqayisədə 51,4% çoxdur. Bunun 553 milyon 51 min manatı müştərilərə verilmiş xalis kreditlərdir. Son bir ildə Bankın kredit portfeli 56,3% artıb. Bankın nağd vəsaitləri 21 milyon 52 min manat, Mərkəzi Bankda müxbir hesabları 7 milyon 751 min manat, “Nostro” hesabları isə 16 milyon 529 min manat təşkil edib.
Bankın öhdəlikləri 65,2% azalaraq 466 milyon 254 milyon manata çatıb. Bunun 442 milyon 62 min manatı müştərilərdən alınmış depozitlərdir. Son bir ildə Bankın depozit portfeli 2,6 dəfə böyüyüb. O cümlədən fiziki şəxslərin depozitləri 2,8 dəfə artaraq 399 milyon 674 min manat, hüquqi şəxslərin depozitləri isə 46% artaraq 42 milyon 947 min manat olub.
“Bank Silk Vey”in 2018-ci ilin üçüncü rübündə cəmi kapitalı 147 milyon 893 min manat olub.
