Məlumat Hesablama Mərkəzi zərərdən mənfəətə keçib

Nəqliyyat, Rabitə və Yüksək Texnologiyalar Nazirliyi yanında Məlumat Hesablama Mərkəzinin (MHM) cəmi aktivləri 2017-ci il yanvarın 1-nə 26 milyon 349 min manat təşkil edib.

Qurumun maliyyə hesabatına görə, bu, 2016-cı il yanvarın 1-i ilə müqayisədə 2,5 dəfə çoxdur.

2017-ci ildə MHM-in uzunmüddətli aktivləri 2,6 dəfə artaraq 17 milyon 877  min manata, cari aktivləri isə 2,3 dəfə artaraq 8 milyon 472 min manata çatıb.

Hesabat dövründə Mərkəzin cəmi öhdəlikləri 11,5 dəfə artaraq 4 milyon 371 min manat, cəmi kapitalı isə 2,15 dəfə artaraq 21 milyon 978 min manat olub.

2017-ci ildə MHM-nin göstərdiyi xidmətlərdən gəlirləri 17 milyon 458 min manat (2016-cı ilə nisbətən 32,5% çox), xidmətlərinin maya dəyəri 15 milyon 72 min manat (31,1% çox), digər əməliyyat gəlirləri 4 milyon 887  min manat (55,5 dəfə çox), məzənnə fərqindən zərəri 25 min manat (3,5 dəfə az), inzibati və digər əməliyyat xərcləri 2 milyon 344 min manat (15,3% çox), mənfəət vergisi ödəmələri isə 1 milyon 153 min manat təşkil edib.

Son nəticədə Mərkəz ili 3 milyon 751 min manat xalis mənfəətlə başa vurub. Halbuki, qurum əvvəlki ildən 505 min manat zərərlə çıxmışdı.