Neft Hürmüz boğazının açılacağı ümidilə ucuzlaşmaqda davam edir (27.08.2026)
Dünya bazarında neft qiymətləri İran və Oman arasında aparılan danışıqların Hürmüz boğazının yenidən açılmasına imkan yarada biləcəyi gözləntiləri fonunda geriləməsini davam etdirib.
“Brent” markalı neftin fyuçersləri 0,7% ucuzlaşaraq 87,24 dollara, ABŞ-ın “WTI” markalı nefti isə 0,7% azalaraq 81,67 dollara düşüb. Beləliklə, “Brent” ardıcıl dördüncü, “WTI” isə beşinci sessiyada ucuzlaşıb.
Hürmüz boğazının açılması gözləntiləri güclənir
İran və Oman arasında Hürmüz boğazının idarə olunması ilə bağlı razılaşmanın detalları üzərində iş aparıldığı bildirilir. İran İnqilab Keşikçiləri Korpusu da iki ölkənin strateji su yolundan istifadə ilə bağlı razılığa gəldiyini açıqlayıb.
Hürmüz boğazından müharibədən əvvəl qlobal neft və təbii qaz istehlakının təxminən beşdə birinə bərabər həcmdə enerji daşınırdı. İranın keçidləri məhdudlaşdırmasından sonra boğazdakı neft axınının normal səviyyənin təxminən dörddə birinə qədər azaldığı bildirilir.
Analitiklər hesab edir ki, danışıqlarda irəliləyişlə bağlı xəbərlər boğazın yenidən açılacağına dair ümidləri artıraraq neft qiymətlərinə təzyiq göstərir. Bununla belə, bazarda təchizatla bağlı narahatlıqlar hələ də qalır.
Dizel ehtiyatları da azalır
Digər tərəfdən, Yaxın Şərq və Rusiya-Ukrayna müharibələrinin dizel yanacağı təchizatına təzyiqi davam edir.
ABŞ Energetika İnformasiyası Administrasiyasının məlumatına görə, avqustun 21-də başa çatan həftədə distillat yanacaq ehtiyatları 2,2 milyon barel azalaraq 103,4 milyon barelə düşüb. Bu, ilin müvafiq dövrü üçün ən aşağı ehtiyat səviyyəsi kimi qiymətləndirilir.
Hazırda neft bazarında əsas diqqət İran-Oman danışıqlarına və Hürmüz boğazında enerji daşımalarının nə vaxt bərpa olunacağına yönəlib.
