Neft ABŞ-İran gərginliyində fasilənin təsiri ilə ucuzlaşdı (28.07.2026)
ABŞ və İran arasında hərbi gərginliyin müvəqqəti azalması qlobal neft bazarında qiymətlərin enməsinə səbəb olub. İnvestorlar diplomatik həll imkanlarının artacağını qiymətləndirərək risk mükafatını azaltmağa başlayıblar.
ENA.az xəbər verir ki, bu barədə Bloomberg məlumat yayıb.
Məlumata görə, Brent markalı neftin sentyabr fyuçersləri 0,6% ucuzlaşaraq bir barel üçün 87,82 ABŞ dollarına, WTI markalı ABŞ xam nefti isə 0,8% enərək 81,95 ABŞ dollarına düşüb. Ticarətin əvvəlində hər iki etalon üzrə qiymətlər son bir həftədən çox müddətin ən aşağı səviyyəsini görüb.
Qiymətlərə təsir edən əsas amil ABŞ Prezidenti Donald Trampın İranla aparılan danışıqların müsbət istiqamətdə getdiyini və tərəflər arasında razılaşmanın mümkün olduğunu bildirməsi olub. Bununla yanaşı, Vaşinqton danışıqlar nəticəsiz qalacağı təqdirdə hərbi əməliyyatların bərpa oluna biləcəyini də istisna etməyib. İran da analoji xəbərdarlıqla çıxış edib.
IG şirkətinin bazar strateqi Toni Saykamorun sözlərinə görə, hazırda gərginliyin daha da artmasının qarşısını ala biləcək diplomatik çıxış yolunun yaranması neft qiymətləri üzərindəki təzyiqi azaldıb. Bununla belə, ekspert Yəməndə husilərin Səudiyyə Ərəbistanının enerji infrastrukturuna mümkün hücumları və Yaxın Şərqdəki geosiyasi risklərin hələ də yüksək olaraq qaldığını vurğulayıb.
Analitiklər hesab edirlər ki, bazarın əsas diqqəti bundan sonra ABŞ-İran danışıqlarının nəticələrinə və regionda enerji təchizatına təsir göstərə biləcək yeni geosiyasi hadisələrə yönələcək.
