Azərbaycanda bank sektoru keçən ay 2%-ə yaxın kiçilib

Azərbaycan banklarının cəmi aktivləri 55 milyard 700 milyon manat, öhdəlikləri 48 milyard 690 milyon manat, balans kapitalı isə 7 milyard 10 milyon manat səviyyəsində olub.

ENA.az bu barədə Azərbaycan Mərkəzi Bankına istinadən xəbər verir.

Beləliklə, son bir ayda bank aktivləri 2 faiz azalıb. Aktivlər iyulun əvvəlində 56 milyard 734.1 milyon manat olmuşdu.

Hesabat ayında bankların kredit portfeli 0.1% artaraq 28 milyard 498 milyon manata yüksəlib. Kredit portfelinin 52.8%-i biznes kreditləri (15 milyard 056 milyon manat), 31.6%-i istehlak kreditləri (9 milyard 002 milyon manat) və 15.6%-i ipoteka kreditləri (4 milyard 440 milyon manat) təşkil edib. Kreditlərin 85.8%-i milli valyutada, 14.2%-i isə xarici valyutada verilib. 2024-cü ilin sonu ilə müqayisədə milli valyuta payı artıb.

Bankların öhdəliklərində depozit portfeli üstünlük təşkil edir. Cəmi öhdəliklərin 75.3%-i və ya 36 milyard 651 milyon manatı depozitlərdən ibarətdir. Depozitlərin 58.8%-i hüquqi şəxslərin (21 milyard 537 milyon manat), 41.2%-i fiziki şəxslərin (15 milyard 114 milyon manat) payına düşür.

Fiziki şəxslərin əmanətlərinin 67.2%-i milli valyutada (10 milyard 159 milyon manat), 32.8%-i xarici valyutada (4 milyard 955 milyon manat) yerləşir. Fiziki şəxslərin əmanət portfelinin 63%-i müddətli əmanətlərdən ibarətdir. İyul ayında müddətli əmanətlər 1.2% artaraq 111.8 milyon manat, tələbli əmanətlər isə 1% azalaraq 58.7 milyon manat təşkil edib.

2025-ci ilin iyulunda bank sektoru üzrə unikal müddətli əmanətçi sayı 5,529 nəfər artaraq illik 15.4% yüksəlib. Hüquqi şəxslərin tələbli depozitləri 16,141 milyon manat təşkil edərək onların cəmi depozit portfelinin 74.9%-ni əhatə edib.

2025-ci ilin yanvar–iyul aylarında banklar 683 milyon manat xalis mənfəət və 1 milyard 086 milyon manat əməliyyat mənfəəti əldə edib. Bu dövrdə ümumilikdə 166 milyon manat məbləğində mənfəət vergisi ödənilib.

31 iyul 2025-ci il tarixinə Azərbaycanda fəaliyyət göstərən 22 bankın filiallarının sayı 498, şöbələrinin sayı 86, ATM-lərin sayı isə 3,357 təşkil edib. Hesabat ayında bank sektorunda çalışanların sayı 0.2% artaraq 26,127 nəfərə çatıb.