Bakıdakı binaların alkopanları niyə sökülür?

Bakıdakı binaların üzərinə vurulmuş alkopanların sökülməsi prosesi başlayıb. Söküntülər hazırda qeyri-yaşayış sahələrindən başlayıb və bununla bağlı bütün xərclər iş adamlarının öz üzərinə düşür.

ENA.az bunu ilk olaraq Xətai rayonunda yerləşən KFC-də müşahidə edib. İşləyən obyektə günorta vaxtı rayon icra hakimiyyəti tərəfindən göndərilmiş işçilər gələrək, içəridə müştəri ola-ola səs-küylə binanın üzlüyünü sökməyə başlayıblar. Bu isə müştəriləri narahat edib və səbəbləri ilə maraqlanıblar. ENA.az-a bildirilib ki, Xətai Rayon İcra Hakimiyyəti bir neçə gün əvvəl məktub göndərib ki, yanğın təhlükəsizliyi tələblərinə və şəhərin ümumi görünüşünə uyğun olmayan alkopanla üzləndiyi üçün tikilinin üzlüyü dərhal dəyişdirilməlidir. Belə işlər xərc və eyni zamanda beynəlxalq brend olduqda xüsusi razılaşdırma üçün vaxt da tələb etdiyindən 15 günə bu tələb yerinə yetirilə bilməyib.

Müştərilərin çox olduğu günorta vaxtı sahibkarlıq subyektinin fəaliyyətinə maneəçilik törədilib. Bu cür hərəkətlər isə ümumiyyətlə ölkənin iqtisadi siyasətinə uyğun deyil və ilk növbədə həmin obyektin və onun sahibinin işinə, imicinə böyük zərbə vurur.

Onu da qeyd edək ki, etibarlı mənbələrdən aldığımız məlumata görə, rayon icra hakimiyyətləri belə bir tapşırığı Bakı şəhər İcra Hakimiyyətindən alıblar. “Bu il ölkəmizdə COP-29 keçiriləcək və alkopan üzlüklərin neft məhsulu olduğunu nəzərə alaraq, belə qərar verirlər”, - deyə bildirilib.

Yerigəlmişkən, COP-28-in keçirildiyi Dubayda bina üzlüklərinin yarısı alkopondur. Üstəlik bu məsələlərin belə “kustar” üsullarla həyata keçirilməsi, şirkətlərə ziyan vurulması bəzi məmurların işlərində nə qədər “peşəkar” olduğunu göstərir.

Onu da nəzərə almaq lazımdır ki, xidmət və iaşə obyektlərinin böyük əksəriyyəti yaşayış binalarının altındadır. Yaşayış binasının üzlüyü tam alkopanla olduğu halda, yalnız xidmət və iaşə obyektinin üzlüyünün dəyişilməsi hansı müsbət effekti yaradacaq, şəhərin görüntüsünü necə “yaxşılaşdıracaq”? – bu da məsələnin başqa tərəfidir.

P.S. Yəqin ki, digər rayon icra hakimiyyətlərində çalışan səriştəli mütəxəssislər məsələyə daha sivil şəkildə yanaşacaqlar. COP-29 ilə əlaqədar şəhərimizə gələn qonaqların indidən sayının artdığı və tədbirə cəmi 7 ay qaldığı bir vaxtda paytaxtımızı əlavə problemlərlə yükləməyəcəklər.