Azərbaycana təyyarə ilə daxil olan yüklərin həcmi kəskin azalıb

2023-cü ilin yanvar-may aylarında Azərbaycanda 90 milyon 934,9 min ton yük daşınıb. Bu da 2022-ci ilin eyni dövrü ilə müqayisədə 6,8% çoxdur. ENA.az Dövlət Statistika Komitəsinə istinadən xəbər verir ki, yük daşımalarının 76,5% qeyri-dövlət nəqliyyat şirkətlərinin, 23,5% dövlət sektorunun payına düşüb.

Özəl şirkətlər tərəfindən yük daşımalarının həcmi ötən ilin müvafiq dövrü ilə müqayisədə 5,3% artıb.

Bu dövrdə dəmir yolu ilə 7 milyon 586,4 min ton (tranzit yüklər daxil olmaqla) yük daşınıb ki, bu da ötən ilin müvafiq dövrünün göstəricisindən 8,8% çoxdur.

Dəniz nəqliyyatı ilə 3 milyon 575,8 min ton (artım 25,3%), avtomobil nəqliyyatı ilə 50 milyon 508,3 min ton (artım 5%), hava nəqliyyatı ilə 117,5 min ton (azalma 45,2%) müxtəlif yük daşınıb. Yanvar-may aylarında daxili neft kəmərləri vasitəsilə 16 milyon 261,3 min ton neft (artım 10,1%) nəql olunub.

Nəqlin qalan həcmi magistral qaz kəmərlərinin payına düşüb.