Neft tədarükünün azaldılmasına dair risklər barədə xəbərdarlıq edilib
Oktyabrın əvvəlində “OPEC+”un neft tədarükünün azaldılması ilə bağlı qərarı dünyada enerji təhlükəsizliyinin sabitliyini təmin edilməsi məsələsində riskləri artırır.
Bu barədə Beynəlxalq Enerji Agentliyinin (IEA) aylıq hesabatında deyilir.
“OPEC+”un neft tədarükünü kəskin azaltması bütün dünyada enerji təhlükəsizliyi risklərini artırır. Hətta aşağı tələb gözləntilərinə baxmayaraq, bu qərar ilin sonuna və 2023-cü ilin birinci yarısına qədər neft ehtiyatlarında çox ehtiyac duyulan artımı kəskin şəkildə azaldacaq”, - hesabatda bildirilib.
Agentliyin məlumatına görə, Səudiyyə Ərəbistanı və BƏƏ “qara qızıl”ın hasilatını azaldacaq: “Bundan başqa, dekabrda Avropa İttifaqının sanksiyalarının başlaması ilə əlaqədar Rusiyada neft hasilatının daha da azalacağı gözlənilir”.
Xatırladaq ki, ötən həftə “OPEC+”a daxil olan dövlətlər noyabr ayından neft hasilatını 2 milyon barel azaltmaq qərarına gəlib.
