794 ədəd istehsal edilib, 179-u anbarlarda qalıb
2018-ci ilin yanvar-noyabr aylarında (11 ayda) Azərbaycanda cəmi 794 ədəd minik avtomobili istehsal edilib (daha doğrusu yığılıb).
Xatırladaq ki, 2018-ci ilin yanvar-oktyabr ayları (10 ayda) ərzində Azərbaycanda 610 ədəd minik avtomobili istehsal edilmişdi. Beləliklə, Noyabrda istehsal 184 ədəd artıb. Sentyabrda artım 152 ədəd təşkil etmişdi.
"BI" Dövlət Statistika Komitəsinə istinadən xəbər verir ki, minik avtomobili istehsalı əvvəlki ilin müvafiq dövrünə nisbətən 26,5 dəfə artıb.
01.12.2018-ci il vəziyyətinə, bu il istehsal edilmiş 794 ədəd minik avtomobilinin 179 ədədi anbarlarda olub. 01.11.2018-ci il vəziyyətinə hazır məhsul ehtiyatı 168 ədəd təşkil etmişdi. Beləliklə, anbarda yığılan minik avtomobillərinin sayı 11 ədəd artıb.
Qeyd edək ki, yerli avtomobillərin əsas alıcıları dövlət qurumlarıdır.
Bu ilin Martında Neftçala Avtomobil Zavodu (Khazar) işə düşüb. Həmçinin Azərbaycanda Naxçıvan Avtomobil Zavodu da (NAZ-Lifan) fəaliyyət göstərir.
“Azərmaş” ASC-yə məxsus Neftçala Avtomobil Zavodunun illik istehsal gücü 10 min avtomobildir. Zavodda 2018-ci ildə 1500 ədəd avtomobil istehsal edilməsi nəzərdə tutulur. Zavodun proqnoza əməl etməsi üçün ilin sonunadək 706 avtomobil istehsal etməlidir. Bu da çox çətin görünür.
