“Amerika qayıtdı!” - Bayden
ABŞ Prezidenti Co Bayden Münhen Təhlükəsizlik Konfransında Amerikanın dünya arenasına qayıtdığını bəyan edib və avropalı tərəfdaşları ilə əməkdaşlığı xarici siyasətin təməl daşı adlandırıb.
Bu barədə “ENA” “RİA Novosti”yə istinadən xəbər verir.
“Mən hamıya deyirəm: Amerika qayıtdı! Transatlantik İttifaq geri döndü və biz geri baxmayacağıq”, - o deyib.
Bundan başqa, amerikalı lider konfrans iştirakçılarını qurumun Nizamnaməsinin beşinci maddəsi çərçivəsində ABŞ-ın NATO müttəfiqlərinin təhlükəsizliyinin təmin edilməsinə sadiqliyinə inandırıb. Beşinci maddəyə əsasən, ittifaq üzvlərindən birinə hücum bütün bloka hücumla bərabər tutulur.
Bayden, həmçinin çıxışında Rusiyanı Aİ ilə NATO-nun birliyini pozmaq cəhdində ittiham edib.
Daha əvvəl NATO-nun baş katibi Yens Stoltenberq təşkilatın strateji konsepsiyasını yeniləməyə çağırıb. Onun sözlərinə görə, təşkilat Rusiya ilə münasibətlərin pisləşməsini və Çinin möhkəmlənməsini nəzərə almır.
