Neftin qiyməti ucuzlaşır: səbəb COVİD-ə yoluxmanın artmasıdır
"COVID-19"a yüksək yoluxma sayı və mövcud məhdudlaşdırıcı tədbirlər tələbin aşağı düşəcəyi gözləntiləri yaradıb və bu fonda neft qiymətləri ucuzlaşır.
Bloomberg yazır ki, tələb proqnozlarının zəifləməsi, bir gün əvvəl dərc olunmuş ABŞ neft ehtiyatlarında azalma məlumatları ilə bazara verilən dəstəyi artırır.
London birjasında ICE Futures markalı mart fyuçerslərinin qiyməti bu gün səhər 9: 45-ə qədər 55,25 dollar/ barel təşkil edir ki, bu da əvvəlki sessiyanın sonundakı qiymətdən 0,56 dollar (0,75%) azdır. 27 yanvar tarixli ticarət nəticəsində bu müqavilələr 0,1 dollar (0,2%) azalaraq bir barel üçün 55,81 dollara düşmüşdü.
WTI xam neftinin mart ayı üçün Nyu-York Ticarət Birjasında (NYMEX) elektron ticarətdə fyuçerslərinin qiyməti bu vaxta qədər 52,53 dollar/barel təşkil edir ki, bu da çərşənbə günü bazarın bağlanışındakı səviyyədən 0,32 dollar (0,61%) azdır. Bir gün əvvəl fyuçerslər 0,24 dollar (0,5%) bahalaşaraq barreli 52,85 dollara yüksəlmişdi.
Əmtəə Tədqiqat Qrupunun Baş Tərəfdaşı Andrew Lebow, "Tələbin səviyyəsində narahatlıq qalmaqdadır", deyib.
Potensial tələbin azalmasına dair əlavə bir siqnal da Kaliforniyada qüvvədə olan məhdudiyyətlər səbəbindən son bir ayda Los-Ancelesdəki trafikin kəskin azalması idi.
Ölkənin enerji nazirliyinin dünən açıqladığı həftəlik hesabata görə, ABŞ-ın neft ehtiyatları keçən həftə 9,91 milyon barel azalıb.
