4 sığorta şirkəti maliyyə zərərinə uğrayıb

"Naxçıvan Sığorta" ASC istisna olmaqla Azərbaycanda fəaliyyət göstərən 21 sığorta şirkətindən 4-ü ötən il maliyyə mənfəəti əldə etməyib. Bunlar "Xalq Həyat Sığorta", "Standard Insurance" Sığorta Şirkəti, "AXA Mbask" Sığorta Şirkəti və "Xalq Sığorta" ASC-lərdir.

Maliyyə zərərinin ən yüksək həddi "Xalq Sığorta"da (17 milyon 656 min manat), ən aşağı həddi isə "Xalq Həyat Sığorta"da (1 milyon 109 min manat) qeydə alınıb.

Qalan 17 sığorta şirkəti isə müxtəlif məbləğlərdə maliyyə mənfəət əldə edib. Bu baxımdan ən yüksək göstərici "PAŞA Həyat Sığorta" ASC-də (40,236 milyon manat), ən aşağı göstərici isə "Rəvan Sığorta" ASC-də (247 min manat) qeydə alınıb.

 6 sığorta şirkətinin maliyyə mənfəəti azalıb

"Naxçıvan Sığorta" ASC istisna olmaqla Azərbaycanda fəaliyyət göstərən 21 sığorta şirkətindən 8-nin ötənilki maliyyə mənfəəti illik müqayisədə çox olub.

Bunlar "Günay Sığorta", "Amrah Sığorta", "Qala Həyat Sığorta", "PAŞA Həyat Sığorta", "PAŞA Sığorta", "Qala Sığorta", "Rəvan Sığorta" və "Atəşgah Həyat Sığorta" ASC-lərdir.

Ən yüksək dinamika "Günay Sığorta"da (14,8 dəfə), ən aşağı dinamika isə "Atəşgah Həyat Sığorta"da (5,4%) qeydə alınıb.

6 şirkətin - "Meqa Sığorta", "A-Qrup Sığorta", "Bakı Sığorta", "İpək Yolu Sığorta" ASC-lər, "Azərsığorta", eləcə də "Azsığorta" ASC-nin isə maliyyə mənfəəti illik müqayisədə az olub. Ən çox azalma "Azsığorta"da (82,3%), ən az azalma isə "Meqa Sığorta"da (22,4%) qeydə alınıb.

2 şirkətin - "Xalq Həyat Sığorta" və "Standard Insurance" Sığorta Şirkəti ASC-lərin isə maliyyə zərəri artıb - müvafiq olaraq 36,3 dəfə və 73,2%.

2 şirkət - "AXA Mbask" Sığorta Şirkəti və "Xalq Sığorta" ASC-lər ötən il maliyyə zərəri ilə üzləşib, əvvəlki il isə maliyyə mənfəəti əldə edib, 3 şirkət - "Atasığorta", "Atəşgah Sığorta" və "Azərbaycan Sənaye Sığorta" ASC-lər isə ötən il maliyyə mənfəəti əldə edib, əvvəlki il maliyyə zərəri ilə üzləşib, odur ki, bu şirkətlərin maliyyə göstəricilərinin dinamikasını hesablamaq mümkün olmayıb.