Azərbaycana yeni nəsil vaqonlar gətiriləcək
Azərbaycan şirkətləri - “Soyuzkontakt-Trans” MMC və ATUTRANS MMC Rusiyanın vaqon istehsalçısı “United Wagon Co” şirkəti ilə 2 razılaşma imzalayıb.
ENA.az bu barədə xarici mətbuata istinadən xəbər verir.
Razılaşmaya əsasən, Rusiya şirkəti bu ilin 2 rübünün sonuna kimi “Soyuzkontakt-Trans”a ümumi tutumu 120 kub/metr və ya 76 ton olan 40 ədəd taxıl bunkeri təhvil verəcək. Belə ki, köhnə versiyalarından 6 ton çox yük götürəcək yeni vaqonların 5 yükləmə lyuku taxılın bərabər paylanmasını təmin edəcək.
“Azərbaycanın taxıl idxalında və tranzit daşımalarında dövriyyə sürətlə artır. Ona görə də şirkətimiz artan dəmir yolu nəqliyyatındakı tendensiyanın mərkəzində olmağa çalışır”, - deyə "Soyuzkontakt-Trans" şirkətinin baş direktoru İlyas Səfərov bildirib.
Bundan başqa, digər Azərbaycan şirkəti ATU TRANS MMC Rusiya şirkətinə taxta materiallarının daşınması üçün 18 açıq vaqon, həmçinin 3 rübün sonuna 5 ədəd vaqon sifariş verib.
Qeyd edək ki, 13-6895 modelli örtülü vaqonların tutumu 72,5 ton, uzunluğu 18 850 mm olan vaqonlar qısa təkər bazasına uyğun olaraq, standart modellərdən 40% daha çox yük daşıya bilir. 11-6874 modelli vaqonların isə tutumu 175 m3 və ya 73 tondur. Üst və yan yükləmə lyukları olan bu vaqonlar köhnə dizaynlarından 5 ton çox yük götürə bilir.
“Bir neçə il əvvəl istehsal edilən 1 520 mm ölçülü, yeni nəsil vaqonların Azərbaycanda istifadəsinin bütün üstünlüklərini tezliklə görəcəyik”, – ATU TRANS şirkətinin direktoru Rafiq Şıxəmirov bildirib.
