İnşaat və əmlak

Bakıda evlər 20-25% ucuzlaşa bilər - EKSPERTDƏN PROQNOZ

Koronavirusla bağlı Azərbaycanda tətbiq olunan karantin rejimi digər sahələrə olduğu kimi daşınmaz əmlak bazarına da təsir göstərəcək.

ENA.az xəbər verir ki, bu barədə "MBA Group" konsaltinq şirkətinin baş direktoru, daşınmaz əmlak sahəsində ekspert Nüsrət İbrahimov deyib.

N.İbrahimov bildirib ki, digər sahələrlə müqayisədə, koronovavirusun əmlak bazarına təsir göstərməsi üçün bir müddət lazımdır:

“Gələn aydan biz bu təsiri hiss edəcəyik. Həm mənzillərin qiymətlərində, aktivlikdə, həm də mənzil portfelinin həcmində bu təsir özünü göstərəcək. Yəni bütün göstəricilərdə biz bu təsiri hiss edəcəyik. Amma bu gün daşınmaz əmlak bazarında qiymətlər artıq tədricən düşməyə başlayır. Ancaq onun haqqında tam fikir söyləmək bu gün tezdir”.

Ekspert vurğulayıb ki, koronavirusun daşınmaz əmlak bazarına təsiri karantin rejiminin müddətindən asılı olacaq:

“Hadisələrin gedişatından asılı olaraq bu təsir qısa, orta və uzunmüddətli olar bilər. Bunların təsir dairəsi isə təbii ki, müxtəlifdir. Qısamüddətli olarsa (1-2 ay) demək olar ki, heç bir ciddi təsir göstərməyəcək. Ortamüddətli (2-3 ay) olarsa təbii ki, bazara təsir göstərəck, qiymətlərdə 10-12 faiz civarında azalma olacaq, uzun müddətli (3 aydan daha artıq, 5 ay-1 il) olarsa, 20-25 faizə qədər qiymət azalması ola bilər”.

N.İbrahimov əlavə edib ki, koronavirusun təsiri aradan qalxdıqdan sonra əmlak bazarı da tədricən özünü bərpa edəcək:

“Təbii ki, virusun təsiri aradan qalxdıqdan, karantin rejimi ləğv olunduqdan 2-3 ay sonra bazar əvvəlki vəziyyətin bərpa edəcək və o zaman bazarda aktivliyin artması da gözləniləndir”.

Ən vacib xəbərləri Telegram kanalımızdan OXUYUN! (https://t.me/enaxeber)