Bakı limanında yüzlərlə TIR yığılıb qalıb: gözləmə müddəti 4-5 gün çəkir
Ələtdə yerləşən Bakı Beynəlxalq Dəniz Ticarət Limanında Türkmənistana məxsus 500-ə yaxın yük avtomobili ilişib qalıb. Eyni zamanda, Türkmənbaşı limanında da həm türkmən, həm də xarici yük maşınlarının tıxacı meydana gəlib.
Bu barədə “Azadlıq Radiosu”nun Türkmənistan xidməti məlumat yayıb.
Sürücülərin sözlərinə görə, onlar dekabrın 19-dan bəri Türkmənistandan gələcək gəmini gözləyirlər. Bərə vaxtında gəlmədiyi üçün Türkiyə və Gürcüstandan yük daşıyan avtomobillər də limana toplaşıb.
Mənbənin yazdığına görə, gecikmələrə səbəb bərələrdən birinin təmirə dayanması olub. Digər bir gəmi isə Həştərxana yola düşdüyündən Ələt limanına gələ bilmir. Adətən, bərə Türkmənistandan Bakı limanına üç gündən bir gəlir, maksimal gözləmə müddəti isə 4-5 gün çəkir. Yanvarın 7-də bərə gəlsə də, ora cəmi 51 yük maşını yerləşdiyindən əksər avtomobillər limanda qalıb. Sürücülər deyirlər ki, yük maşınları arasında 20 gündür ki, növbə gözləyənlər var: "Burada hər bir sürücüdən liman dayanacağında uzun müddət dayanmasına görə 200 dollar cərimə tələb olunur. Əks halda Azərbaycan nümayəndələri yük maşınlarını bərəyə buraxmayacaqlarını bildiriblər" - deyə sürücülərdən biri şikayətlənib.
Sürücülər bildirirlər ki, Türkmənistan hakimiyyətinin onlara kömək edəcəyinə ümid bəsləyiblər. Ancaq 7 və 8 yanvar tarixlərində Türkmənistanın Azərbaycandakı səfirliyinin bir neçə nümayəndəsi Bakı limanına gələrək sürücülərə deyiblər ki, cəriməni ödəməsələr, bərə Türkmənistana yarıboş qayıdacaq.
Bakı Beynəlxalq Dəniz Ticarət Limanından problemin olduğunu təsdiq ediblər, Lakin bildiriblər ki, burada Azərbaycan tərəfinin heç bir günahı və rolu yoxdur. Habelə limanda gözləyən maşınların sayı göstərildiyi qədər deyil, xeyli azdır. Problem isə Türkmənistana məxsus “Bəxtiyar” gəmi-bərəsinin xarab olmasından və təmirə dayanmasından qaynaqlanır.
“Azərbaycan tərəfi onlara Xəzər Dəniz Gəmiçiliyinə məxsus gəmi-bərəyə bilet alıb yola düşməyi təklif edib. Lakin türkmən sürücülər deyirlər ki, onlar öz gəmi-bərələrinə hər iki istiqamətə bilet alıblar və nəticədə Türkmənistan bərəsi ilə getmək istəyirlər, əlavə xərc çəkib Azərbaycan bərəsinə bilet almaq istəmirlər. Lakin belə olan halda Azərbaycan qanunvericiliyinə əsasən onlar limanda 14 gündən artıq dayandıqlarına görə nəzərdə tutulan vergini də ödəməlidir. Əvvəllər də belə situasiya yaranıb, amma Azərbaycan tərəfi türkmənistanlı sürücülərə anlayışla yanaşıb”,-mənbə bildirib.
Virtualaz.org-a mənbə onu da deyib ki, limana bir-iki gün əvvəl daxil olan yük maşınları da var və onların sürücüləri həmin vergini ödəmədən yola düşə bilər. Amma limanda 14 gündən artıq gözləyən sürücülər həmin maşınların sürücülərini onlarla həmrəylik nümayiş etdirməyə sövq edir, yəni sözü bir yerə qoyublar və vergini ödəmədən getmək istəyirlər.
