“Əlavə işçi qəbuluna görə Gürcüstanda zərərə düşdük”
“PAŞA Bank”ın Gürcüstandakı törəmə bankının 2019-cu ilin 1-ci yarısındakı xalis zərəri yeni işçilərin qəbulu ilə bağlıdır".
Bunu "PAŞA Bank"ın İdarə Heyətinin üzvü, Baş Maliyyə İnzibatçısı Bəhruz Nağıyev bildirib.
““PAŞA Bank Gürcüstan” bazar payını artırmağa çalışır. Bu hədəf çərçivəsində 2019-cu ilin birinci yarısında əlavə 188 nəfər işə qəbul edilib. Əməkhaqqı xərclərinin artması ilə əlaqədar olaraq törəmə bankımızın zərəri yarandı. İndi yeni kollektivin vəzifəsi portfeli artıraraq gəlirləri qaldırmaqdır”,- Bəhruz Nağıyev deyib.
Qeyd edək ki, 2018-ci ilin 1-ci yarısı ilə müqayisədə 2019-cu ilin 1-ci yarısında “PAŞA Bank Gürcüstan” böyüməsinə və gəlirlərinin artmasına baxmayaraq həmin dövrü 2 milyon 298 min manat xalis zərər ilə başa vurub. 30 İyun 2018-ci il tarixi ilə müqayisədə “PAŞA Bank Gürcüstan”ın cəmi aktivləri 21% artaraq 30 İyun 2019-cu il tarixində 246 milyon 11 min manata çatıb. Bankın kredit portfeli isə 38% artaraq 141 milyon 418 min manata yüksəlib.
"PAŞA Bank"ın Türkiyədə törəmə bankı olan "PAŞA Yatrım Bankası" isə 2019-cu ilin 1-ci yarısını 3 milyon 977 min manat xalis mənfəət ilə bağlayıb. Ötən ilin eyni dövrü ilə müqayisədə "PAŞA Yatrım Bankası"nın xalis mənfəəti 44% azalıb.
