Əmanətlərdə dollarlaşma azalıb
2019-cu ilin Mart ayının sonu ilə müqayisədə Aprel ayında banklarda fiziki şəxslərin əmanətləri 375,9 milyon manat artaraq 8 milyard 715 milyon manat təşkil edib. Müqayisə üçün qeyd edək ki, 2019-cu ilin Fevral ayı ilə müqayisədə Mart ayında banklarda fiziki şəxslərin (əhalinin) əmanətləri 125,1 milyon manat artmışdı.
"ENA" Mərkəzi Bankın statistikasına istinadən xəbər verir ki, Mart ayının sonu ilə müqayisədə Apreldə milli valyutadakı əmanətlər 323,6 milyon manat artaraq 3 milyard 621 milyon manata, xarici valyutadakı əmanətlər isə 52,2 milyon manat artarq 5 milyard 93,9 milyon manata çatıb.
Aprelin sonunda cəmi əmanətlərin 41,5%-i milli valyutada, 58,5%-i xarici valyutada olub.
Mart ayının sonunda fiziki şəxslərin 8 milyard 339,1 milyon manat cəmi əmanətlərinin 3 milyard 297,4 milyon manatı və ya 39,54%-i milli valyutada, 5 milyard 41,7 milyon manatı va ya 60,46%-i xarici valyutada idi.
Maliyyə Bazarlarına Nəzarət Paltasının aylıq statistikasına görə, 30 Aprel 2019-cu il tarixinə banklarda fiziki şəxslərin depozitləri (əsasən əhalinin əmanətləri) 8 milyard 625 milyon manat təşkil edib. Mart ayının sonu ilə müqayisədə Apreldə fiziki şəxslərin depozitləri 371 milyon manat və ya 4,5% artıb. Martın sonunda fiziki şəxslərin banklarda 8 milyard 254 milyon manat depozitləri var idi. Apreldəki artım banklara müddətli depozit yerləşdirilməsi ilə bağlı deyil. Tələbli depozitlərdəki artım cəmi depozitlərin artmasına təsir göstərib.
Belə ki, depozitlər müddətli və tələbli depozitlərdən ibarətdir. Apreldə müddətli depozitlər cəmi 4 milyon manat, tələbli depozitlər isə 367 milyon manat artıb. 30 Aprel 2019-cu il tarixində müddətli depozitlər 5 milyard 470 milyon manat, tələbli depozitlər isə 3 milyard 156 milyon manat təşkil edib.
Sahibkarlıq fəaliyyəti ilə məşğul olan fiziki şəxslərin depozitləri tələbli depozitlərə daxil edilir. Fərdi sahibkarların depozitləri Martın sonundakı 85,6 milyon manatdan 89,8 milyon manata yüksəlib.
Müqayisə üçün qeyd edək ki, 2018-ci ilin sonunda fiziki şəxslərin depozitləri 8 milyard 270 milyon manat, o cümlədən müddətli depozitlər 5 milyard 479 milyon manat,tələbli depozitlər 2 milyard 791 milyon manat təşkil etmişdi. Ötən ilin sonu ilə müqayisədə ilk 4 ayda müddətli depozitlər 7 milyon manat azalıb.
