Axtar

İçərişəhəri "tikənlər" - Məsələnin beş tərəfi

İçərişəhərdə gerçəkləşdirilən tikinti hadisələrinə qarşı ictimai rəy mənfidir. İdaəredicilərin bu mənfi rəyi basdırmaq cəhdləri isə yaxşı hal deyil. Çünki İçərişəhər ortaq dəyərdir, ortaq məxrəcdir və hər bir Azərbaycan vətəndaşının İçərişəhərdə baş verən hadisələrə öz yanaşmasını qoymaq hüququ və haqqı mövcuddur.

Məsələnin birinci və eyni zamanda əhəmiyyətli bir tərəfi, İçərişəhər kimi şəhərin tarixi hissəsinin belə bir "deformasiya" əməli ilə üzləşməsidir. Hazırda orada aparılan tikinti işləri faktiki olaraq şəhərin həmin tarixi yerinin formasına ciddi təsir edir, tarixilik dərəcəsinə zərbə vurur.

Məsələnin ikinci tərəfi isə budur ki, İçərişəhərdə aparılan hazırki tikinti işləri yeni və ilk deyil, bu daha öncə də orada aparılan eyni tərz işlərin davamıdır. Görünən odur ki, bu məsələyə qarşı müqavimətsizlik və ya yumşaq müqavimət İçərişəhərdə aparılan tikinti işlərini davamlı proses halına gətirib. Bu isə tarixi yerlərin qədimiliyini və quruluşunu təhlükə altına alır.

Məsələnin üçüncü tərəfi, ictimai rəyin nəzərə alınmasının əhəmiyyəti ilə bağlıdır. İçərişəhər kimi tarixi yerlər cəmiyyətin ortaq məxrəclərindən hesab olunur. Yəni, bu bizim hamımızın ortaq məxrəcimiz, ortaq dəyərimizdir. Ona görə də bu barədə danışan hər bir fərdin fikri nəzərə alınmalıdır. Bugün güclü olan bir qrupun belə tarixi yerə laqeyd yanaşması eyni zamanda onların tarix qarşısındakı məsuliyyətini də artırır. Tarixə dəyilən zərbə çətin aradan qaldırılır.

Məsələnin dördüncü tərəfi bu və bu kimi məsələlərdə assimetrik informasiyanın yaratdığı pis nəticələrdir. Yəni nə cəmiyyət, nə də maraqlı qruplar öncədən və proses zamanı İçərişəhərdə aparılan işlərlə bağlı tam məlumatlandırılmayıblar. Bu da assimetrik informasiya problemini yaradır. Natamam informasiya çərçivəsində insanlar güman qura bilmirlər, gələcəyi aydın proqnoz edə bilmirlər. Ortaq məxrəc hesab edilən işlərdə cəmiyyət tam informasiya ilə təmin edilməlidir. İçərişəhərdəki tikinti işləri ilə də bağlı eyni xətt izlənilməlidir.

Məsələnin beşinci tərəfi qorunmayan tarixlə gələcəyə vurulan zərərin anlaşılmasıdır. Tarixin qorunmadığı, hətta dağıdılmağa çalışıldığı yerlərdə gələcək qurularkən ciddi maneələr ortaya çıxır. Çünki gələcək qurmaq yalnız yenilikləri qəbul etməklə baş vermir, eyni zamanda, keçmişin halqalarını gələcəyin halqaları ilə birləşdirməklə baş verir. Keçmişin halqalarının zəiflədilməsi və ya yox edilməsi gələcəyi də təhlükəyə atır.

Sonda bir məqamı qeyd edim, bu tip məsələlərdə insanların həssaslığı göstərir ki, onlar ciddi işlərdə həssasdırlar, sadəcə bu həssaslığı gerçək işə köçürə biləcək sistem yoxdur. Cəmiyyətimizin ortaq məxrəcini təhlükə altında qoymaq əvəzinə onları qorumağı bacarmalıyıq. Bu məsələlər cinahların üstündə məsələdir. Əksər yerlərdə olduğu kimi bizdə də istismarçı yox, əhatəedici yanaşma uğur qazanacaq

Təhmasib Əlizadə

Əlaqə

Email : enanewsaz@gmail.com

Tel : +994 70 500 12 33