Bank

3 bankın mənfəət vergisi ödəmələri artıb, 5 bank vaxtından əvvəl ödəyib

Azərbaycanda fəaliyyət göstərən 30 bankdan 5-i bu ilin yanvar-mart aylarında mənfəət vergisi ödəyib ki, bunlardan da 3-də sözügedən göstərici ötən ilin eyni dövrü ilə müqayisədə çox olub.

Bunlar "Kapital Bank" (2,1 dəfə), "Azərbaycan Sənaye Bankı"dır (94,9%) və "Yapı Kredi Bank Azərbaycan"dır (79,1%). 

Digər 2 bank - "Xalq Bank" və "Unibank" ötən ilin I rübündə vergi ödəmədiyi üçün onun mənfəət vergisi ödəmələrinin dinamikasını hesablamaq mümkün olmayıb.

1 il bundan əvvəl mənfəət vergisi ödəmiş "PAŞA Bank" isə bu ilin ilk 3 ayında vergi ödəməyib. Odur ki, bu bankın mənfəət vergisi ödəmələri 100% azalıb. 

1 bank - İran Milli Bankının Bakı filialı ötən ilin I rübündə mənfəət vergisi ödəməyib, bu ilin I rübündə vergi ödəmələrinə qənaət edib, qalan 23 bank isə həm ötən ilin yanvar-mart aylarında, həm də bu ilin eyni dövründə mənfəət vergisi ödəməyib. Odur ki, həmin bankların da vergi ödəmələrinin dinamikasını hesablamaq mümkün olmayıb.

 

5 bank mənfəət vergisini vaxtından əvvəl ödəyib

Azərbaycanda fəaliyyət göstərən 30 bankdan 5-i mənfəət vergisi ödəmək üçün ilin sonunu gözləməyib.

Bunlar "Kapital Bank", "Xalq Bank", "Azərbaycan Sənaye Bankı" və "Yapı Kredi Bank Azərbaycan" və "Unibank"dır. Adları çəkilən banklar bu ilin yanvar-mart aylarında dövlət büdcəsinə müvafiq olaraq 12 milyon 435 min manat, 1 milyon 751 min manat, 731 min manat, 539 min manat və 8 min manat, ümumilikdə 15 milyon 464 min manat mənfəət vergisi ödəyiblər. 

1 bank - İran Mili Bankının Bakı filialı mənfəət vergisi ödəmələrinə 5 min manat qənaət edib. 

Qalan 24 bank isə bu məsələni ilin sonuna saxlayıb. Bunlardan 8-i I rübü zərərlə başa vurmuş "AGBank", "NBC Bank", "Amrah Bank", "Bank BTB", "Bank of Baku", "Muğan Bank" və "Access Bank"dır ki, onların mənfəət vergisi ödəməməsi təbiidir.

Ən vacib xəbərləri Telegram kanalımızdan OXUYUN! (https://t.me/enaxeber)